«Ավիաուսումնական կենտրոն» ՓԲԸ
Տնօրեն՝ Կամո Մարտիրոսյան
info@aviatrainingcenter.am
+374 60 37 35 47
ք. Երևան, «Զվարթնոց» օդանավակայան
ՄԵՐ ՄԱՍԻՆ
Պատմություն
Հայաստանի քաղաքացիական ավիացիան հիմնադրվել է 1933 թվականին: 1961 թվականին ստեղծվել է ուսումնավարժական էսկադրիլիան, որը մի շարք անվանափոխումներից հետո 1993 թ. ստացել է իր ներկայիս անվանումը՝ «Ավիաուսումնական կենտրոն», իսկ է 2001 թ. ստացել է ներկա կազմակերպաիրավական ձևը՝ ՓԲԸ:
Արցախյան հերոսամարտի տարիներին Հայաստանի Հանրապետության պաշտպանության նախարարության պատվերով կենտրոնը պատրաստել է 39 օդաչու և 44 ավիատեխնիկ: 1994-97 թթ. Հայաստանի Հանրապետության քաղաքացիական ավիացիայի պատմության մեջ առաջին անգամ կենտրոնը պատրաստել է քաղաքացիական ավիացիայի առևտրային 9 օդաչու, ովքեր արդեն տարբեր տիպի օդանավերի օդաչուներ են: 2007-2017 թթ. ուսումնական կենտրոնը պատրաստել է 18 առևտրային օդաչու, 2004-2019 թթ.՝ 113 օդային երթևեկության կարգավար, 2007-2019՝ 141 փոխադրումների կարգավար, 2009-2017 թթ.՝ 31 ավիատեխնիկ: Օդագնացի կոչումն ընտրած և ավիացիոն կենտրոնն ավարտած ուսանողներից շատերն այսօր աշխատում են ինչպես Հայաստանի, այնպես էլ այլ երկրների քաղաքացիական ավիացիայում:
Ներկայիս ավիաուսումնական կենտրոնը (ԱՈՒԿ) ստեղծվել է Հայաստանի Հանրապետության քաղաքացիական ավիացիայի գլխավոր վարչության Ազգային ավիացիոն դպրոցի հիմքի վրա, Հայաստանի Հանրապետության կառավարության 1993 թվականի մարտի 9-ի թիվ 89 որոշմամբ և Հայաստանի Հանրապետության քաղաքացիական ավիացիայի գլխավոր վարչության 1993 թվականի մարտի 15-ի թիվ 87 հրամանով:
Նպատակներ
Ավիացիոն ուսումնական կենտրոնի գործունեության հիմնական նպատակներն են թռչող անձնակազմերի, օդային երթևեկության կառավարման (ՕԵԿ) կարգավարների, ճարտարագիտատեխնիկական աշխատակազմի, թռիչքուղեկցորդների, ավիացիոն անվտանգության, փոխադրումների ծառայության աշխատակիցների և այլ ավիացիոն մասնագետների նախնական պատրաստումը, վերապատրաստումը և որակավորման բարձրացումը: Ավիաուսումնական կենտրոնի առաքելությունն է քաղաքացիական ավիացիայի մասնագետներին արժանի փոխարինողներ պատրաստելը:
Գործունեություն
Իր հիմնադրման օրից ի վեր կենտրոնն ուսուցանել է բազմաթիվ ավիացիոն մասնագետների: Ավիաուսումնական կենտրոնը 2003 թվականից լիցենզավորված է Հայաստանի Հանրապետության կրթության և գիտության նախարարության կողմից: Կենտրոնն իրականացնում է միջազգային ավիացիոն կրթական չափորոշիչներին և պահանջներին համապատասխան ավիացիոն մասնագետների ուսուցում և միջին մասնագիտական կրթական ծրագրերով պատրաստում է.
- առևտրային օդաչուներ,
- օդային երթևեկության կառավարման կարգավարներ,
- օդային փոխադրումների կազմակերպիչներ,
- ավիատեխնիկներ:
Ավիաուսումնական կենտրոնը Հայաստանի Հանրապետության քաղաքացիական ավիացիայի կոմիտեի կողմից տրված համապատասխանության վկայականի հիման վրա իրավունք ունի պատրաստելու.
- սիրողական օդաչուներ,
- թռիչքուղեկցորդներ:
Ավիաուսումնական կենտրոնը միակ հաստատությունն է Հայաստանի Հանրապետությունում, որն իրականացնում է կրթական ծրագրեր քաղաքացիական ավիացիայի հիմնական մասնագիտությունների գծով մասնագետների նախնական պատրաստման, կայացած ավիացիոն մասնագետների որակավորման բարձրացման և վերապատրաստման ուղղությամբ:
Բացի այդ, կենտրոնում կազմակերպվում է նաև օդաչուների և ՕԵԿ կարգավարների ավիացիոն անգլերենի ատեստավորում: Այստեղ են նախնական պատրաստություն անցնում և բարձրացնում իրենց որակավորումը հայրենական թռիչքուղեկցորդները: Թռիչքային և սրահի անձնակազմերի ուսուցման դասընթացների, վերապատրաստումների և գիտելիքների խորացման պարտադիր ուղղություններից են վտանգավոր բեռների փոխադրումը, ավիացիոն անվտանգության ապահովումը, մարդկային գործոնները, ավիացիոն անգլերենը, օդային օրենսդրությունը և այլն: Ճարտարագիտատեխնիկական աշխատակազմի ուսուցման դասընթացներից են վառելիքաբաքի անվտանգությունը, էլեկտրացանցի տեղակայման համակարգերը և այլն:
Օդաչուների և ավիատեխնիկների ուսման տևողությունը 3 տարի է, իսկ օդային երթևեկության կառավարման կարգավարների և օդային փոխադրումների կազմակերպման բաժիններում՝ 2.5 տարի: Կենտրոնի շրջանավարտները ստանում են պետական նմուշի դիպլոմ և պատրաստ են միջին մասնագետի որակավորմամբ աշխատանքի անցնելու քաղաքացիական ավիացիայի տարբեր ծառայություններում: Բարձր առաջադիմությամբ առկա ուսուցման առաջին կուրսի 15 ուսանողներ սովորում են անվճար, պետպատվերի շրջանակում: Գործում է նաև ռոտացիոն համակարգը:
Ընդունելություն
Ընդունելությունը կատարվում է միջին մասնագիտական կրթական ծրագրով առկա ուսուցմամբ անվճար և վճարովի տեղերին համապատասխան: Անվճար ուսուցմամբ տեղերում առաջին հերթին ընդունվում է միջնակարգ կրթության ատեստատի միավորների (այդ թվում քննական), նախնական մասնագիտական (արհեստագործական), միջին մասնագիտական, բարձրագույն մասնագիտական կրթության դիպլոմի ներդիրի գնահատականների միջին թվաբանականի և տվյալ մասնագիտության համար սույն կարգի ցանկով ընդունելության մրցութային առարկաների գնահատականների (միավորների) ընդհանուր առավելագույն գումար ունեցող դիմորդը:
Համագործակցություն
Ավիացիոն մասնագետների ուսուցումն իրականացվում է միջազգային ավիացիոն կազմակերպությունների պահանջներին համապատասխան: Կենտրոնը գործակցում է Ուլյանովսկի ավիացիոն ինստիտուտի, Քաղաքացիական ավիացիայի միջազգային կազմակերպության (ՔԱՄԿ՝ «ԻԿԱՕ») Կիևի տարածաշրջանային կենտրոնի հետ:
Գործատուներ
Շրջանավարտների ներուժային գործատուներն են.
- «Զվարթնոց» և «Շիրակ» օդանավակայանների կառավարիչ «Արմենիա» միջազգային օդանավակայններ» ՓԲԸ,
- Հայաէրոնավիգացիա ՓԲԸ,
- «Աքիլլա Տեխնիքս» ՍՊԸ,
- «Արմենիա ավիաընկերություն» ՍՊԸ,
- «Արմենիա Էյրվեյզ» ՓԲԸ ավիաընկերությունը,
- «Ատլանտիս Յուրոփիան Էյրվեյզ» ՍՊԸ ավիաընկերությունը,
- «Մարս Ավիա» ՓԲԸ ավիաընկերությունը,
- «Տարոն-Ավիա» ՍՊԸ ավիաընկերությունը:
Ընդունելություն 2020՝ «Ավիաուսումնական կենտրոն» ՓԲԸ-ում
20.07.2020
Հուլիսի 20-ից մեկնարկել է նախնական և միջին մասնագիտական ուսումնական հաստատություններ դիմում-հայտերի ընդունման գործընթացը, որն այս տարի անցկացվում է առցանց՝ dimord.emis.am հարթակում։
Առկա (ստացիոնար) ուսուցման մրցույթին մասնակցելու համար դիմորդի դիմում հայտը և փաստաթղթերն այսօրվանից էլեկտրոնային եղանակով ընդունվում են կրթության կառավարման տեղեկատվական համակարգում.
-Ոչ ոլորտային մասնագիտություններով` մինչև օգոստոսի 15-ը ներառյալ, ժամը 1800:
-Ոլորտային մասնագիտություններով (որտեղ կա քննություն)` մինչև օգոստոսի 3-ը ներառյալ, ժամը 18:00։ Քննություններն անցկացվում են օգոստոսի 5-15-ն ընկած ժամանակահատվածում:
-Հեռակա ուսուցման համար՝ մինչև նոյեմբերի 25-ը ներառյալ, ժամը 18:00:
Դիմորդների կողմից դիմում հայտերը կրթության կառավարման տեղեկատվական համակարգում կարող են փոփոխվել մինչև գործերի ընդունման օրվա ավարտը:
Դիմորդը կրթության կառավարման տեղեկատվական համակարգում էլեկտրոնային եղանակով լրացնում է դիմում հայտը, որն իր մեջ ներառում է անձնական տվյալները, ինչպես նաև Հանրային ծառայության համարանիշը կամ օրենքով սահմանված կարգով դրանից հրաժարվելու մասին տեղեկանքի համարը։ Դիմորդը կից ներբեռնում է նաև`
1) լուսանկար,.
2) կրթության մասին փաստաթղթի (դիպլոմի դեպքում նաև ներդիրի) պատճենը,
3) անձը հաստատող փաստաթղթի պատճենը (անձնագիր, կամ ծննդյան վկայական՝ մինչև 16 տարեկան դիմորդի համար, կամ զինվորական գրքույկ, կամ ՀՀ ոստիկանության բաժինների կողմից տրվող անձը հաստատող ժամանակավոր փաստաթուղթ, կացության վկայական, փախստականի վկայական),
4) կցագրման վկայականի պատճենը (զորակոչային տարիք ունեցող դիմորդից ընդունվում են զինհաշվառման փաստաթղթերում տարկետման իրավունք տվող համապատասխան նշումի կամ չզորակոչվելու պատճառը հաստատող այլ նշումների առկայության դեպքում, իսկ նախկինում առողջության պատճառով տարկետում ունեցողներից՝ Հանրապետական զորակոչային հանձնաժողովի նշումների առկայության դեպքում),
5) ընդունելության արտոնության իրավունքը հաստատող փաստաթղթի պատճենը (առկայության դեպքում),
6) իր ընտրած մասնագիտության համար պահանջվածից ավելի բարձր կրթության ավարտական փաստաթղթի պատճենը (առկայության դեպքում), ինչպես նաև այդ մասնագիտությանը համապատասխան` վարպետային ուսուցման որակավորման կամ կարճաժամկետ դասընթացի վկայականի պատճենը (առկայության դեպքում),
7) միջազգային և հանրապետական մրցույթների (օլիմպիադաների, փառատոների) դիպլոմների պատճեները (առկայության դեպքում),
8) պետական բարձրագույն ուսումնական հաստատություն ընդունվելու համար տվյալ տարվա, ինչպես նաև նախորդ տարվա հանձնած ընդունելության քննությունների գնահատականների վերաբերյալ փաստաթուղթի պատճենը (առկայության դեպքում),
9) աշխատանքի վայրից տեղեկանքի պատճենը (առկայության դեպքում),
10) դիմում-հայտ ներկայացրած ուսումնական հաստատության հաշվեհամարին փոխանցած գումարի անդորրագրի պատճենը:
Ներկայացված կեղծ տեղեկատվության համար դիմորդը ենթակա է օրենքով սահմանված կարգով պատասխանատվության:
Դիմորդը կարող է դիմել մեկ ուսումնական հաստատություն մեկ մասնագիտության հայտագրմամբ՝ անվճար և վճարովի ուսուցման հիմունքով:
Դիմորդի դիմում-հայտը կարող է մերժվել ընդունող հանձնաժողովի կողմից դիմորդի դիմում-հայտի և/կամ փասթաթղթերի թերի ներկայացման դեպքում, եթե թերությունները դիմորդի կողմից չեն վերացվում` այն ներկայացնելուց 3 աշխատանքային օրվա ընթացքում, բայց ոչ ուշ քան դիմում հայտերի ընդունման վերջնաժամկետից 1 օր առաջ` նշելով մերժման հիմքը, ինչպես նաև առկա (ստացիոնար) ուսուցմամբ ըստ կրթության հիմքի և մասնագիտության (բացառությամբ արվեստի ոլորտի) 10 դիմում հայտից քիչ լինելու դեպքում` դիմում հայտերի ընդունման վերջնաժամկետից 1 օր առաջ, որի մասին նույն օրը տեղեկացվում է դիմումատուին հեռախոսակապի և դիմումատուի էլեկտրոնային հասցեի միջոցով:
Դիմորդը միջին մասնագիտական կրթական ծրագրով ընդունելության գործընթացի կազմակերպման և անցկացման համար հաստատության հաշվեհամարին վճարում է 1000 (հազար) ՀՀ դրամ: Անկախ մրցույթին մասնակցելուց և ընդունելության արդյունքից՝ վճարված գումարը դիմորդին հետ չի վերադարձվում։
Այս տարի դիմորդները քննություն կհանձնեն մեկ առարկայից։ Դիմորդի կողմից դւմում-հայտը երկայացնելուց հետո ԿՏԱԿ-ի կողմից դիմումատուի անհատական էջում ձևավորվում է քննության մասնակցության թերթիկը, որում նշվում է քննության օրվա, ժամի և քննության անցկացման վայրի մասին տեղեկատվությունը, որը դիմորդը թղթային տարբերակով ներկայացնում է քննական հանձնաժողովին` քննասենյակ մտնելիս:
Ոլորտային մասնագիտություններով ընդունելության քննություններն անցկացնում են քննական հանձնաժողովները` հաստատության տնօրենի (ռեկտորի) հաստատած ժամանակացույցի համաձայն:
Մրցույթի արդյունքում ըստ մասնագիտությունների, կրթական հիմքի և ուսուցման ձևի թափուր մնացած տեղերի վերաբերյալ տեղեկատվությունը ԿՏԱԿ-ը 3 աշխատանքային օրվա ընթացքում հրապարակում է կրթության կառավարման տեղեկատվական համակարգում։ Մրցույթից դուրս մնացած դիմորդները թափուր տեղերի մրցույթին մասնակցելու համար կարող են դիմել մինչև օգոստոսի 22-ը։
Ընդունելություն «Ավիաուսումնական կենտրոն» ՓԲԸ-ում
17.07.2019
«Ավիաուսումնական կենտրոն» ՓԲԸ-ը միջին մասնագիտական կրթություն տալու համար հայտարարում է 2019-2020 ուսումնական տարվա ընդունելություն հետևյալ մասնագիտություններով:
1. Փոխադրումների կազմակերպում և կառավարում օդային տրանսպորտում /1041.01.5/: Որակավորումը՝ տրանսպորտում օդային փոխադրումների կազմակերպման և կառավարման տեխնիկ-կարգավար (առկա ուսուցում): Հատկացված է 5 անվճար և 40 վճարովի տեղ, ուսման տևողությունն է 2 տարի 6 ամիս, ուսման վարձը՝ տարեկան 270 հազար ՀՀ դրամ:
2. Օդային տրանսպորտի երթևեկության կառավարում /1041.02.5/: Որակավորումը՝ օդային տրանսպորտի երթևեկության կառավարման կարգավար (առկա ուսուցում): Հատկացված է 5 անվճար և 30 վճարովի տեղ, ուսման տևողությունը 2 տարի 6 ամիս է, ուսման վարձը՝ տարեկան 270 հազար ՀՀ դրամ:
3. Թռչող ապարատների և ավիաշարժիչների տեխնիկական շահագործում /0716.06.5/: Որակավորումը՝ թռչող ապարատների և ավիաշարժիչների շահագործման և տեխնիկական սպասարկման տեխնիկ (առկա ուսուցում): Հատկացված է 5 անվճար և 20 վճարովի տեղ, ուսման տևողությունը 3 տարի է, ուսման վարձը՝ տարեկան 280 հազար ՀՀ դրամ:
Բոլոր մասնագիտությունների համար դիմորդները պետք է ունենան միջնակարգ (լրիվ) ընդհանուր կրթություն:
Դիմորդը հանձնաժողովին անձամբ պետք է ներկայացնի.
1) դիմում,
2) կրթության մասին փաստաթղթի բնագիրը և պատճենը,
3) 3x4 չափսի 4 լուսանկար,
4) անձնագիրը և պատճենը,
5) կցագրման վկայականի պատճենը կամ զինվորական գրքույկի պատճենը,
6) արտոնության իրավունքը հաստատող փաստաթուղթ (առկայության դեպքում):
Ընդունելության կազմակերպման և անցկացման համար դիմորդը ներկայացնում է անձնագիրը և վճարում 1000 դրամ:
Փաստաթղթերը հարկավոր է ներկայացնել «Ավիաուսումնական կենտրոն» ՓԲԸ (hասցե՝ ք. Երևան, «Զվարթնոց» միջազգային օդանավակայան) մինչև օգոստոսի 16-ը (ամեն օր ժամը 9.00-17.30, բացի շաբաթ և կիրակի օրերից):
Ընդունելությունը կատարվում է հարցազրույցով: Հարցազրույցն անցկացվելու է օգոստոսի 19-ին:
Հարցերի դեպքում կարող եք զանգահարել հետևյալ հեռախոսահամարով` 29-29-29 (414, 415),
«Զվարթնոց» միջազգային օդանավակայանի վարչական տարածքում` 414, 415:
